Langue limousine

Aprep s’esser eissaiat emb talent au doblatge de dessenh animat, au mes de decembre, los eslevas talentuós de l’opcion occitan, de beupeirat a Limòtges, venen de viure una experiença novela. Los eslevas de las classas de 5^e, 4^e e 2da an  partecipat a rodatges de doas emissions en partenariat emb la chadena en linha Oc Tele. Merce a tots los adultes que nos ajudats tan a l’aquarium que a Montròl Senard. 

Veiquí lo compte rendut que ne’n an fach los 5ema e los 4ema. 

Lo 7 de junh, los peissons de l’aquarium de Limòtges an auvit parlar occitan tota la matinada per daus dròlles plen de vam e d’estrambòrd. Avem rencontrat una esquipa de rodatge professionala tot plen brava. Avem escrich lo scenari, avem apres un pauc a filmar de sequéncias. Avem utilizat lo materiau daus professionaus tot en descubrir las colissas d’un rodatge: per exemple coma tornar dire mai d’un còp la mesma chausa. Avem apres un fum d’informacions sus tots los peissons.

Sem tornats urós, la testa clafida de braves sovenirs. L’esquipa de rodatge era formidabla e sem segurs que tornarem pas viure un’aventura entau còp sec. Avem descubert de sensacions novelas coma lo tràc.

Finfinala volem mercejar tota l’esquipa de oc tele e la de l’aquarium que nos a aculits. Merce per quela brava jornada que demorará un sovenir meravilhós e tanben un grand bravò a Eva la presentatriça !